Setbergsskóli

Útskrift 10. Bekkinga fór fram á sal skólans við hátíðlega athöfn þann 7. júní. Boðið var upp á kaffiveitingar að athöfn lokinni. Snorri Rafn Theodórsson hlaut viðurkenningu fyrir hæstu meðaleinkunn en auk hans fengu margir aðrir viðurkenningar m.a. fyrir frábæran árangur í bóklegum og verklegum greinum, framfarir og þátttöku í félagsstarfi nemenda. Við óskum öllum útskriftarnemum til hamingju með áfangann og sendum þeim okkar bestu kveðjur og þakkir fyrir samveruna hér í skólanum.

Fleiri myndir frá útskriftinni koma síðar.

Vorferðalag 5. bekkja.  Farið var upp að vatnsstíflunni  fyrir ofan leikskólann Hlíðarenda.  Þar var leikið sér í læknum, tjaldað, grillað og farið drullukökukeppni.  Sólin skein í heiði og voru krakkarnir ánægðir með þessa ferð.

 Fleiri myndir frá ferðinni.

Vorferð 3. bekkinga var farin þriðjudaginn 18. maí. Haldið var að bænum Miðdal í Kjós og dýrin skoðuð. Þarna gat að líta öll þau helstu húsdýr sem við höfum verið að fjalla um upp á síðkastið og voru börnin vel undirbúin fyrir þessa heimsókn.

Margir héldu að kýrin með hornin væri naut en við nánari skoðun sáu þau að það gat nú ekki verið því hún var með spena og nautin voru á öðrum stað í fjósinu. Þarna gafst börnunum tækifæri á að halda á kettlingum, hvolpum, lömbum, kiðlingum og hænum. Í fjósinu gátu þau rólað sér og dottið í heyið og var það mjög vinsælt hjá þeim. Á bænum eru íslensku landnámshænurnar og var gaman að sjá þær þar sem þær eru svo litskrúðugar.

Allir héldu glaðir heim á leið eftir ánægjulega dvöl í sveitinni.

 Smellið til að fá fleiri myndir.

Föstudaginn 14. maí buðu nemendur í öðrum bekk foreldrum sínum í skólann.  Fyrst sungu börnin nokkur lög á sal skólans.  Því næst var farið í stofur og nemendur sýndu foreldrum sínum afrakstur fjallaverkefnis sem þau hafa unnið nú á vorönn. Takk fyrir skemmtilega samverustund.

 Fleiri myndir frá heimsókninni má sjá hér.