Setbergsskóli

Föstudaginn 26. febrúar var haldið skólaþing í Setbergsskóla. Hugmyndin að skólaþingi kviknaði síðastliðið haust þegar skólaráð skólans var að móta starfsáætlun sína fyrir veturinn en eitt af verkefnum skólaráðs er að halda opinn fund með þátttöku allra sem að skólasamfélaginu koma. Einnig ber skólaráði að fjalla um starfsáætlun og stefnu skólans og eftir að hugmyndin um skólaþing fór að þróast þá var ákveðið að taka út þá þætti sem sérstaklega snúa að samskiptum heimila og skóla og skoða sýnileika þeirra í starfinu, hvað væri gert vel og hvað væri hægt að gera betur. Til skólaþingsins var svo boðað starfsfólk skólans (það var skipulagsdagur þennan dag), stjórn foreldrafélags og bekkjarfulltrúar auk annarra foreldra sem áhuga höfðu á því að mæta. Alls tóku tæplega 70 manns þátt í þinginu.

Dagskrá skólaþings var:

Kl. 8:00 – 8:20: Tilgangur og stutt kynning, farið yfir þá þætti sem til skoðunar voru.
Kl. 8:20 – 9:00: Hópvinna – starfsmenn skólans og foreldrar unnu saman í hópum.
Kl. 9:00 – 9:30: Samantekt og hópaskil.

Þingfulltrúum var skipt í sex hópa og hver og einn hópur fékk eitt viðfangsefni. Viðfangsefni hópanna voru þessi:

1. Samkvæmt lögum um grunnskóla skal starfrækja foreldrafélag.
2. Jafnan skal viðhafa markvisst upplýsingaflæði milli heimila og skóla: Halda skal úti virkri heimasíðu  sem uppfærð er reglulega og viðhafa öflugt upplýsingaflæði innan skólans og út á við.
3. Foreldrum skal boðið upp á fræðslu.
4. Upplýsa skal foreldra um stefnu skólans og leiðarljós og kynna fyrir þeim bekkja- og skólareglur.
5. Bjóða skal upp á góða aðstöðu til félagsstarfa í samstarfi skóla og Setursins (félagsmiðstöð skólans),  með öflugu félagslífi í skólanum og skólaferðalögum og vettvangsferðum.
6. Áhersla skal lögð á að börnunum líði vel í skólanum.

Hver hópur fékk 40 mínútur til að fjalla um sitt viðfangsefni og notaði SVÓT – greiningu til að greina viðfangsefni sitt. Niðurstöður Skólaþingsins verða dregnar saman og kynntar foreldrum. Sömuleiðis verður úrbótaáætlun gerð því margar gagnlegar ábendingar komu fram um skólastarfið og umræður voru uppbyggilegar og góðar.

Fleiri myndir frá skólaþingi.